Չէր ուզում լինել նա չորրորդը, չէր ուզում լինել նա երրորդը, չէր ուզում լինել նա պահեստային… Նա ուզում էր լինել միշտ առաջինը: Այս հավակնոտ հայտարարությամբ նա մտավ շոու-բիզնես, մեկը մյուսի հետեւից
տեսահոլովակներ նկարահանեց, երգեց երգեր, որոնք դեռահասաների շրջանում
դարձան ամենատարածվածները: Հասավ համագործակցությունների ժամանակը: ՀՏ
Հայկո, Արեւիկ Ալավերդյան, Apricota, դե՛, իսկ Դերհովայի ու Արփիի հետ
համագործակցության արդյունքում ծնված «Իմն ես» երգն էլ շատ արագ դարձավ
հիթ ու որոշակի ժամանակահատվածում բոլոր հիթ-շքերթների առաջին
հորիզոնականները զբաղեցրեց:
Արդեն ժամանակն էր ամփոփել այս ընթացքում կատարված աշխատանքը: Մեզ այդ
ամփոփումը ներկայացվեց շատ պարզ անվան ներքո` ուղղակի «DAVO»: Երեկ «Disc
Planet»-ում ռեփեր Դավոյի առաջին ձայնասկավառակի շնորհանդեսն էր:
«Շատ ուրախ եմ, որ լույս է տեսել առաջին ձայնասկավառակս: Սպասումներս
մեծ են: Բայց ինձ համար ամենակարեւորը լսարանի արձագանքն է, որին շատ եմ
սպասում: Անկախ նրանից` կարծիքները դրական կլինեն, թե բացասական, ես ուրախ
կլինեմ: Դրանց շնորհիվ կիմանամ` ինչն եմ լավ արել, ինչը` մի քիչ ավելի
վատ, ինչի վրա պիտի հետագայում ուշադրություն դարձնեմ ու որ ուղղությամբ
աշխատեմ: Ես շատ շնորհակալ եմ նրանց, ովքեր լսում են իմ երգերը: Խոստանում
եմ` սպասելիքները կարդարացնեմ ու կանեմ շատ ավելին, քան պահանջվում է»,-
ասում է երիտասարդ ռեփերը:
Ձայնասկավառակը լույս է տեսել երկու` էժան ու թանկ տարբերակներով:
Թանկ տարբերակում կան լրացուցիչ երեք երգ, երգերի խոսքերով գրքույկ եւ
նկարներ: Ռեփերի խոսքերով` երկու տարբերակով լույս ընծայելու միակ նպատակն
այն է, որ թեկուզ եւ էժան տարբերակով ձեռք կբերենք երաժշտական որակյալ
սկավառակ: Նրա կարծիքով` այս դեպքում «ծովահեններին» այնքան էլ հեշտ չի
լինի խանգարել իր գործունեությանը:
Դավոյին շնորհավորելու էին եկել ինչպես երկրպագուներն ու նրա երգն ու
երաժշտությունը նախընտրող երիտասարդները, այնպես էլ ընկերները` Դավոյի
տեսահոլովակների ռեժիսոր ու ինչ-որ չափով նաեւ նրա պրոդյուսեր Արեն
Բայադյան, Արեւիկ Ալավերդյան, Դերհովա, ՀՏ Հայկո, Աստղիկ Սաֆարյան, Գարո,
Լիլու, Մարիաննա Հովհաննիսյան:
Մենք էլ մեր կողմից ռեփեր Դավոյի առաջին «DAVO»-ին մաղթում ենք բարի երթ եւ իհարկե` երբեք չլինել պահեստային:
