Главная » 2010 » Февраль » 26 » Վարդան Բադալյանի «Հոգու լույսը» փետրվարի 26-ին ճառագեց «Սայաթ-Նովա» համալիրի «Կոլիզեյ» ակումբում:
20:58:32
Վարդան Բադալյանի «Հոգու լույսը» փետրվարի 26-ին ճառագեց «Սայաթ-Նովա» համալիրի «Կոլիզեյ» ակումբում:
Շատ ռոմանտիկ ստացվեց, չէ՞: Բայց հավատացե´ք` սա ավելորդ բառերի շարան չէ:
Պարզապես միայն ռոմանտիկա է ներշնչում առաջին ձայնասկավառակի համար
ընտրված անվանումը:
«Առաջին ձայնասկավառակս որոշեցի «Հոգու լույս» երգի անունով կոչել: Նախ
հենց երգի թե´ բառերի, թե´ երաժշտության մեջ ինչ-որ պայծառություն կա:
Բացի դրանից` ինձ թվում է` ձայնասկավառակում ընդգրկված բոլոր երգերի մեջ
էլ լույս կա: Իսկ այն, որ ես իսկապես հոգի եմ դնում բոլոր կատարումներիս
մեջ, միանշանակ այդպես է»,- մինչ շնորհանդեսի սկիզբը մեզ հետ կիսվեց
Վարդան Բադալյանը:
Ձայնասկավառակում ներառված են հեղինակներ Արսեն Գրիգորյանի, Ռիչարդ
Մադլենյանի, Մանե Հակոբյանի երգերը: «Հոգու լույս»-ի դիզայնն իրականացրել
է Հովիկ Շահբազյանը, իսկ լուսանկարները Հակոբ Սիմոնյանինն են:
Շնորհանդեսը սկսվեց նախատեսվածից մոտ երեսուն րոպե ուշ: Պատճառն ամենեւին
էլ երգչի բացակայությունը չէր: Նա հենց նշված ժամին նշված վայրում էր:
Երգչի երկրպագուները, ընկերներն ու մտերիմներն էլ չէին ուշացել: Բայց
երեւի մի քանի տարվա աշխատանքը մեկ` այն էլ առաջին ձայնասկավառակով
ներկայացնել, իսկապես, մի քիչ հուզիչ, մի քիչ էլ պատասխանատու գործ էր, ու
երեւի երգիչը փորձում էր մի փոքր էլ ժամանակ շահել` մտովի պատրաստվելով
«հոգում կուտակված լույսը» հավաքվածների հետ կիսելու պահին: «Կոլիզեյը»
լեփ-լեցուն էր: Ներկաների թվում էին Հասմիկ Կարապետյանը, Մրոն, Արսեն
Գրիգորյանը, Արմոն, Մարիաննան եւ այլք:
Կյանքում ամեն ինչ էլ առաջին անգամ է լինում: Բայց առաջինը, բացի մեծ
ցնծություն լինելուց, նաեւ մեծ պատասխանատվություն է: Երգիչը
հավաստիացրեց, որ թեեւ իր կյանքում շատ կարեւոր է առաջին ձայնասկավառակի
լույսընծայումը, բայց սա ամենեւին էլ չի նշանակում, որ նրա մյուս
ստեղծագործությունները տուժելու են այդ պատճառով: «Ես շարունակելու եմ
նույն պատասխանատվությամբ ու նվիրումով ստեղծագործել»,- ամփոփեց երգիչը:
