Երաժիշտ, երգահան, բազմաթիվ երաժշտական տեսահոլովակների ռեժիսոր,
տարբեր երաժշտական գործիքներին տիրապետող եւ աշխարհահռչակ "System of a
Down” ռոք-խմբի բաս-կիթառահար 36-ամյա Շավո Օդադջյանը իր զբաղմունքների
ցուցակը համալրեց եւս մեկով` կտավներ ստեղծելով:
Համադրելով լուսանկարչությունը եւ գրաֆիկական արվեստը, լույսը եւ
խավարը` Շավո Օդադջյանը ստանում է երբեմն մռայլ եւ տրամադրության
փոփոխություններին ենթարկվող ինքնապատկերները:
Շավոյի կտավների հավաքածուի թողարկմամբ զբաղվում է "WAIL When Art
Imitates Life” (Երբ արվեստը կրկնօրինակում է կյանքը) Լոս Անջելեսյան
ընկերությունը, որը համագործակցում է բազմաթիվ երաժիշտ արվեստագետների հետ:
Ի դեպ, Շավոն ներկայացնում է իր ստեղծագործությունների հավաքածուների
փոփոխված և անփոփոխ տարբերակները: Նկարները փոփոխված են անձամբ Շավո
Օդադջյանի կողմից եւ ներկայացված են սահմանափակ քանակությամբ` միայն 100
նկար: Դրանք ներկայացված են
http://whenartimitateslife.com/shavo/index.html հասցեով:
"System of a Down” խմբի գործունեության առաջին օրից ի վեր, ես եմ
զբաղվել խմբի տեսահոլովակների, շրջագայությունների հետ կապված ձևավորման
բոլոր հարցերով: Ուզում եմ բոլորիդ արվեստի մեջ ներգրավեմ, այն այնքան
հարազատ է դարձել ինձ: Հուսով եմ դուք նույնպես խորապես կցնցվեք արվեստով:
Եւ հիշեք` ազատամիտ եղեք եւ մնացեք խորհրդավոր: Խաղաղություն բոլորիդ”,
գրել է Շավո Օդադջյանը Ֆեյսբուքի իր էջում:
Շավո Օդադջյանի արվեստի գործերը արդեն հնարավոր է ձեռք բերել www.thewailproject.com կայքում:
|