Նադեժդա Սարգսյանի շահերը ներկայացնող իրավաբան Վրեժ Կիրակոսյանը
Հանրային հեռուստաընկերության կողմից սահմանված «Եվրատեսիլի» նախընտրական
փուլի կանոնները համեմատելով «Եվրատեսիլ» միջազգային մրցույթի կանոնների
հետ, հայտնաբերել է մի շարք խախտումներ: Այսօր հրավիրած ասուլիսում
իրավաբանը նշեց, որ Հանրային հեռուստաընկերության սահմանած կանոններում
չկա որևէ կետ այն մասին, թե ով է որոշելու հավասար միավորներ հավաքած
մասնակիցների ճակատագիրը, քվեարկության կարգը խախտվելու դեպքում ինչ
որոշում է կայացվելու և այլն:
«Եվրոպական հեռարձակողների միությունն այս բոլոր նախադեպերը նախատեսել
է: Իսկ Հայաստանում սա կամ ոչ գիտակ անձնավորության կողմից է կազմված կամ
արված է այն բանի համար, որպեսզի հետագայում տարբեր մեկնաբանություններ
տալու հնարավորություն ունենան»,- նշեց Կիրակոսյանը:
Նրա խոսքով` համերգից հետո ինքը sms հաղորդագրությունների
քվերակությամբ զբաղվող «Ինտերմոբ» ընկերությանը դիմել է տվյալներ ստանալու
համար, բայց պատասխան դեռ չի ստացել:
Իրավաբանը նշեց, որ Էմմի և Միհրան զույգի ներկայացուցիչներն իրենց
դիմումների պատասխանները չստանալու դեպքում կդիմեն դատարան, ինչպես նաև
Եվրոպական հեռարձակողների միություն: