Հանրային հեռուստառադիոխորհրդի նախագահ Ալեքսան Հարությունյանն այսօրվա
ասուլիսին հերքեց վերջին օրերին շրջանառվող այն լուրերը, թե Հանրային
հեռուսատաընկերությունը խոստացել էր, որ Էմմին և Միհրանն են մասնակցելու
այս տարվա «Եվրատեսիլ» մրցույթին:
«Ես կամ Հանրային հեռուստաընկերությունը եթե որոշեինք, որ պետք է
ուղարկենք որևէ երգչի կամ երգչուհու, դրա համար բոլորովին կարիք չկար
այդքան ծախս անել և մրցույթ անցկացնել: Տրամաբանությունը չեմ հասկանում,
թե ինչու պետք է մենք մեր գլխին փորձանք սարքեինք. եթե որոշել էինք ինչ-որ
մեկին ուղարկել, սուս ու փուս կուղարկեինք: Մրցույթ անցկացնել կամ
չանցկացնելը մեր իրավունքն է, բայց ոչ երբեք պարտավորությունը»,- նշեց նա:
Հարությունյանը դժգոհություններն արդարացի համարեց այնքանով, որ
sms-ներ ուղարկողները դժվարությունների են հանդիպել, սակայն այս ամենի մեջ
Հանրային հեռուսաընկերությանը մեղադրելն անարդարացի համարեց: «Հանրային
հեռուսաընկերությունը ոչ բջջային օպերատոր է, ոչ էլ պրովայդեր, այլ
պարզապես հրապարակում է եղած թվերը: Սակայն հետագայում ուշացած sms-ները
վկայել են, որ ավելի է խորանում տարբերությունը առաջին, երկրորդ և երրորդ
տեղերի միջև»,- ասաց Հարությունյանը:
Նշենք, որ այսօրվա մեկ այլ ասուլիսում Էմմիի մայրը` երգչուհի Նադեժդա
Սարգսյանը հայտարարեց, որ Էմմի-Միհրան զույգին «Եվրատեսիլին»
մասնակցությունը խոստացել է Հանրային հեռուստառադիոընկերության խորհրդի
նախագահ Ալեքսան Հարությունյանը:
|