Նոր ռադիոշոու, նոր ալբոմ, նոր ստուդիա, հյուրախաղեր եւ …
Յուրաքանչյուր ուրբաթ եւ շաբաթ օրերին ժամը 22-ից "Նոր ռադիո”-ի ուղիղ
եթերում DJ Վակցինան է իր նոր հեղինակային` "DJ Vakcina’s Radioshow”
ծրագրով: Որոշեցինք հյուրընկալվել Վակցինայի հաղորդման ռադիոստուդիայում,
զրուցել իր նոր ակումբային նախագծերի մասին:
Ռադիոյի ասպարեզում վաղուց "հաստատված” Վակցինան որոշել է վերականգնել 3
տարի շարունակ "Հայ FM”-ում վարած իր հեղինակային "Club Time” ծրագիրն
արդեն նոր անվանմամբ: Նա պատմում է, որ այդ ռադիոծրագրի շնորհիվ
ակումբային երաժշտությունն այսօր ավելի մասսայական է. "Դեռ 3-4 տարի առաջ
փորձում էի ամեն կերպ պրոպագանդել ակումբային երաժշտությունը: Ասում էին`
ծանր երաժշտություն եմ մատուցում, հեշտ չի ընկալվում, բայց այսօր զգում եմ,
որ անորակ ռաբիզի, փոփի, հիփ-հոփի կողքին հնչում է որակյալ ակումբային
երաժշտություն”:
Ռադիոշոուի ընթացքում 2 ժամ նոն-ստոպ ձեւաչափով հնչում է ակումբային
երաժշտություն, նաեւ ներկայացվում են ակումբային կյանքի նորություններ ու
երաժշտության մասին պատմական ակնարկներ. "Ինձ համար շատ կարեւոր է ունենալ
նման ռադիոշոու, ուր կարող եմ մատուցել իմ ստեղծած սեթերը: Հյուրեր շատ քիչ
կլինեն. միայն Երեւանում հյուրընկալված արտասահմանյան դիջեյները, նաեւ այն
երգիչները, որոնք ակումբային նոր երգեր կունենան ներկայացնելու
ունկնդիրներին: Եթե դիջեյները չհասցնեն գալ ստուդիա, ինքս բացառիկ
հարցազրույցներ կանեմ, կներկայացնեմ եթերում”,- ասում է դիջեյ Վակցինան:
Նրա խոսքերով, նույնիսկ այն մարդիկ, ովքեր այնքան էլ չեն սիրում ակումբային
երաժշտություն, ինչ-որ չափով հետաքրքրված են. "Ովքեր իրենց ժամանակակից,
պրոգրեսիվ երիտասարդ են համարում, ամեն դեպքում հետաքրքրվում են: Նույնիսկ
եղել են մարդիկ, որոնք գաղափար չեն ունեցել, չեն սիրել այս երաժշտությունը,
կարողացել եմ նրանց "հեղափոխել”, հիմա շատ են սիրում եւ երաժշտությունը,
եւ ակումբները, եւ փարթիները”:
Վակցինան ասաց, որ ռադիոծրագրի շրջանակներում անընդհատ նորություններ
կլինեն. "Բավական երկար ենք նախապատրաստվել, PR արել, ծրագրի ֆորմատն էլ
միայն ակումբային է լինելու: Շուտով կիրականացնենք "ռադիոակումբ” նախագիծը,
այսինքն` հայ եւ արտասահմանցի դիջեյները լայֆ սեթեր են հնչեցնելու
ակումբային տեխնիկայով”:
Նոր CD , նոր ստուդիա, հյուրախաղեր եւ…
Վակցինան "The Laboratory” անվանումով ստուդիա է բացել: Մասնագիտությամբ
կենսաբան է, ու նրա հետ կապված բոլոր անունները մասնագիտական տերմիններ
են:): Իր "լաբորատորիան” զբաղվելու է փարթիների կազմակերպմամբ,
պրոդյուսինգով, PR-ով, երաժշտության գործիքավորմամբ, ռեմիքսների
պատրաստմամբ եւ այլն: Ի դեպ, բազմաթիվ սկսնակ դիջեյներ կան, ովքեր դիմում
են Վակցինային իրենց պրոդյուսինգով զբաղվելու ակնկալիքով: Այժմ Վակցինան
աշխատում է միայն մեկ դիջեյի` DJ GiorGio ATTOLLI-ի հետ, որը կմասնակցի
Վակցինայի կազմակերպած փարթիների մեծ մասին եւ կներկայացնի իր սեթերը "Նոր
ռադիո”-ի եթերում:
"Ստուդիան հիմնել եմ "8 bit” նախագծի երկու եղբայրների հետ: Նրանք ապրում
են Երեւանում, ուղղակի ակումբներ չեն գալիս, մի քիչ թաքնված են, բայց
այնքան տաղանդավոր են ու այնպիսի լսողություն ունեն, որ ես ապշում եմ: "8
bit”-ը բարձր ռեյտինգ ունի դրսում, իրենց track-ները բարձր գներով
վաճառվում են արտասահմանյան կայքերում: Միասին աշխատել ենք իմ առաջին CD-ի
վրա, որտեղ հանդես եմ գալիս որպես դիջեյ-երգահան”:
Ձայնասկավառակը կոչվելու է "Double Injection” ("Կրկնակի ներարկում”), ուր
ներկայացված է 9 ստեղծագործություն. "Ալբոմը հակաթմրամոլային բնույթի է:
Հատուկ անուններով ու հերթականությամբ են լինելու ստեղծագործությունները:
Իմաստն այն է, որ առաջին թրեքում մարդուն թմրանյութ են ներարկում, հետո ի
հայտ են գալիս առողջական խնդիրներ, վատ ազդեցություն է նկատվում, այդ ամենն
երաժշտությամբ կարելի է ընկալել: Վերջում "Perfect Way”
ստեղծագործությամբ մարդը կանգնում է ճիշտ, իդեալական ուղու վրա ու
մաքսիմալ երջանկություն է ստանում իրական կյանքից”:
Հայաստանի առաջին աղջիկ դիջեյն այլ նորություններ էլ ունի. առաջիկայում
հյուրախաղերով մեկնելու է Լիբանան, Սիրիա, Մոսկվա, նաեւ եվրոպական մի քանի
քաղաքներ. "Այս տարվա համար "The Laboratory”-ն նախատեսել է մի քանի
մասշտաբային փարթիներ, ալբոմի պրեզենտացիա ու էլի մի "թույն” նախագիծ:),
որի փակագծերն ավելի ուշ կբացեմ”,- ասաց Վակցինան:
|
