Главная » 2010 » Март » 18 » Ասպարեզ են մտնում նոր տրիոն եւ դուետները
23:39:21
Ասպարեզ են մտնում նոր տրիոն եւ դուետները
Դասախոսության գործնական մասը կարող է դառնալ հաջող կարիերայի սկիզբ:
Այսօր Երեւանի Կոմիտասի անվան պետական կոնսերվատորիայում երաժշտասեր
հանրության եւ լրագրողների դատին ներկայացան «SOLI» տրիոն, DUO «THESIS»
եւ «DUALITE» դուետները:
Կոնսերվատորիայի մագիստրատուրայի մի քանի ուսանողներ որոշել են համատեղել
իրենց երաժշտական ունակություններն ու համատեղ աշխատել: Իսկ այդ գործում
նրանց խորհրդատուն եւ օգնականն է իրենց դասախոսը` դաշնակահար Արամ
Ավետյանը:
Երկու տարի առաջ Արամը ռեկտորատ էր ներկայացրել մի ծրագիր, որի իրագործման
արդյունքում մագիստրատուրայի ուսանողները գիտելիքներ ձեռք կբերեն այն
մասին, թե ինչպես կարելի է շուկայական արդի հարաբերություններում ճիշտ
մատուցել եւ ներկայացնել իրենց աշխատանքը:
Համերգային ծրագրի բանավոր ներկայացում եւ կատարում առարկայի շրջանակներում
նրանք սովորում են նաեւ ճիշտ գովազդ կառուցել եւ շփվել լրատվամիջոցների
ներկայացուցիչների հետ: Այսօրվա ասուլիսը նաեւ տեսական գիտելիքները
գործնականում կիրառելու նպատակ ուներ, եւ ուսանողներն իրենց արդարացրին:
Արամ Ավետյանը գոհ էր:
Միայն աղջիկներից բաղկացած անսամբլների ներկայացուցիչները խոսեցին իրենց
ընտրած ուղղությունների, ստեղծագործությունների, ինչպես նաեւ ապագա
անելիքների մասին: Իրարից բավականին տարբեր, բայց երաժշտության շուրջ
միավորված երաժիշտներն առաջնորդվում են տարբեր սկզբունքներով. մի դուետի
համար շատ կարեւոր է հայկական երաժշտության ներկայացումը, մյուսը
նախընտրում է կատարել այնպիսի գործեր, որոնք երբեք չեն հնչել կամ քիչ են
հնչում եւ այլն:
DUO «THESIS»-ը հանդիսատեսին ներկայացրեց Կարեն Խաչատրյանի` դաշնամուրի եւ
ջութակի համար գրված սոնետը: Աղջիկների կարծիքով` նրան Հայաստանում շատ
քչերն են ճանաչում, բայց նա նույնքան տաղանդավոր է, որքան իր հորեղբայրը`
Արամ Խաչատրյանը: Ի դեպ, Կարեն Խաչատրյանն է գրել Զանզիբարի եւ Սոմալիի
օրհներգերը:
Այս տարի աղջիկները պատրաստվում են նաեւ համերգային ծրագրով շրջագայել
Հայաստանի մարզերում, չեն բացառվում նաեւ արտասահմանյան
ուղեւորությունները: